আমাৰ বন্যপ্ৰাণী ৰক্ষাৰ আন্দোলন তথা প্ৰকৃতি ৰক্ষাৰ আন্দোলনক যাতে কোনেও অপব্যৱহাৰ কৰিব নোৱাৰে

আজিৰ সময়খিনি অসমৰ বন্যপ্ৰাণী সংৰক্ষণ আন্দোলনৰ সৰ্বাধিক প্ৰত্যাহ্বানপূৰ্ণ সময়।

কিছুমান মানুহে তেওঁলোকৰ ৰাজনৈতিক অভিসন্ধিৰ বাবে অসমৰ প্ৰকৃতি ৰক্ষাৰ আন্দোলনটোক ব্যৱহাৰ কৰিবলৈ বিচাৰে৷ প্ৰকৃতি সংৰক্ষণৰ কথা কোৱাটো তেওঁলোকৰ ওচৰত জনমত আদায় কৰাৰ এটা কৌশল৷ প্ৰকৃতি সংৰক্ষণৰ কথা কৈ সহজতেই অসমৰ প্ৰকৃতিপ্ৰেমী ৰাইজক নিজৰ স্বাৰ্থ সিদ্ধিৰ বাবে ব্যৱহাৰ কৰাৰ এটা সুযোগ দেখা পায় এই সুবিধাবাদী ব্যক্তিসকল৷

মোৰ এটা কথা ভাবি মনৰ মাজত সন্তোষ হয় যে– অসমৰ সাধাৰণ মানুহে, প্ৰকৃত বন্যপ্ৰাণীৰ প্ৰতি সংবেদনশীল মানুহবোৰে৷ মেধাবী অধ্যাপক সকলে, নতুন প্ৰজন্মৰ শিক্ষিত যুৱক–যুৱতী সকলে, চিন্তাশীল ব্যক্তিসকলে আৰু পৰিপক্ক চিন্তাবিদসকলে ইতিমধ্যেই কৃত্ৰিম, উদ্দেশ্য প্ৰণোদিত আৰু সুবিধাবাদী প্ৰকৃতি ৰক্ষাৰ কথা কোৱা ব্যক্তিসকলক প্ৰত্যাখ্যান কৰা আৰম্ভ কৰি দিছে৷ এই প্ৰৱণতা আমাৰ অসমৰ পৰিৱেশ আন্দোলনক অধিক নিখুঁতৰূপে অগ্ৰগতি প্ৰদান কৰিব৷

আমাৰ অসম তথা ভাৰতৰ বিকাশৰ অগ্ৰগতী, কিছুমান শক্তিয়ে কাম্য নকৰে৷ তাৰে ভিতৰত কিছুমান স্থানীয় শক্তি আছে আৰু কিছুমান বিদেশী শক্তিও আছে৷ বিদেশী শক্তিবোৰে টকা–পইচা, বঁটা–বাহন, বিদেশ ভ্ৰমণ, আন্তৰ্জাতিক আলোচনা চক্ৰত সুযোগ গ্ৰহণ ইত্যাদিৰ মাধ্যমেৰে স্থানীয় শক্তিবোৰক উৎসাহ আৰু সহায় প্ৰদান কৰি থাকে৷ স্থানীয় ৰাজনৈতিক শক্তিবোৰে বিৰোধীৰ সময়কালত হোৱা বিকাশবোৰত নিজৰ দলৰ বিফলতা তথা অকৃতকাৰ্যতা ৰূপে গণ্য কৰে৷ যাৰ ফলত বিৰোধীৰ সময়ত হোৱা বিকাশৰ অগ্ৰগতিক সদায় বাধাগ্ৰস্ত কৰিবলৈ চেষ্টা কৰে৷ আৰু এই কামটো কৰিবলৈ গৈ তেওঁলোকে প্ৰকৃতিপ্ৰেমীৰ ছদ্মবেশ ধাৰণ কৰি আমাৰ প্ৰকৃতি ৰক্ষাৰ আন্দোলনটোক ব্যৱহাৰ কৰি, ৰাইজক প্ৰভাৱিত কৰিবলৈ চেষ্টা চলায়৷

        বিদেশী শক্তিবোৰে আকৌ সামান্য বেলেগ পদ্ধতিত কামটো পৰিচালনা কৰিবলৈ বিচাৰে৷ আমি প্ৰত্যেকেই অৱগত যে আমেৰিকাই ভাৰতৰ বিকাশ আৰু ভাৰতীয় মানুহৰ অগ্ৰগতিত থকা অৰ্থনৈতিক উন্নতি হোৱাৰ বাবে সুখী নহয়৷ ব্ৰিটেইন– অৰ্থাৎ বৃটিছবোৰে যিসকলে এটা সময়ত প্ৰায় তিনিশ বছৰ ধৰি আমাক পদানত কৰি ৰাখিছিল, পৰাধীন কৰি ৰাখিছিল, শোষণ বঞ্চনা কৰিছিল তেওঁলোকৰ দেশতকৈ বৰ্তমানে আমাৰ দেশ ভাৰতবৰ্ষৰ অৰ্থনৈতিক অগ্ৰগতি অধিক ক্ষিপ্ৰ৷ এই দেশবোৰে সদায় আমাৰ দেশৰ বিকাশক বাধাগ্ৰস্ত কৰিবলৈ বিচাৰে৷ আৰু এয়া স্বাভাৱিক৷ আমাৰ দেশৰ বিকাশক বাধা প্ৰদানৰ বাবে, দেশী আৰু বিদেশী শক্তিবোৰে আমাৰ প্ৰকৃতি ৰক্ষাৰ আন্দোলনক কামত লগাবলৈ চেষ্টা কৰি থাকে৷ তেওঁলোকে এনেধৰণৰ এটা বৰ্ণনা, বিবৃতি বা আখ্যান আমাৰ মানুহৰ সন্মুখত তুলি ধৰিব বিচাৰে যাৰ দ্বাৰা সাধাৰণ মানুহবোৰৰ এনেকুৱা এটা ধাৰণা হয় যে – সেই বিশেষ বিকাশৰ কামটো কৰিলে আমাৰ প্ৰকৃতিৰ সংঘাতিক ক্ষতি হ’ব৷ আমাৰ প্ৰকৃতি ৰক্ষাৰ ধনাত্মক আন্দোলনৰ ফলত আমাৰ মানুহবোৰেই তাৰ বিৰোধ কৰিবলৈ আৰম্ভ কৰে৷ লগে লগে আমাৰ বিকাশক বাধা প্ৰদান কৰিবলৈ বিচৰা বিদেশী শক্তিবোৰে নিজৰ উদ্দেশ্যত সফলতা লাভ কৰাৰ সুযোগ পায়৷ প্ৰকৃতি সংৰক্ষণ আৰু আমাৰ বিকাশ দুটা দুটাৰ পৰিপন্থি, এনেকুৱা এটা ভুল ব্যাখাক জনপ্ৰিয় কৰাৰ বাবে দেশী–বিদেশী শক্তি কিছুমানে আমাৰ সমাজত সক্ৰিয় হৈ থাকে৷ তেওঁলোকে প্ৰকৃত বন্যপ্ৰাণী সংৰক্ষণৰ কামত উৎসাহ প্ৰদান নকৰে, বন্যপ্ৰাণী সংৰক্ষণৰ কৃত্ৰিম কিছুমান কামৰ প্ৰতি তেওঁলোকৰ আগ্ৰহ৷ কাৰণ সঁচা অৰ্থত অসমৰ প্ৰকৃতি ৰক্ষাৰ আন্দোলনটোক এওঁলোকে শক্তিশালী কৰিবলৈ বিচাৰে৷ বিদেশী ভাৰত বিৰোধী শক্তিটো বিচাৰে, তেওঁলোকৰ টকা–পইচাৰ দান ভিক্ষাৰ মাধ্যমে, মিথ্যা বঁটা প্ৰদানেৰে, অৰ্থহীন আৰু কোনো প্ৰকৃতি সংৰক্ষণৰ কামৰ প্ৰতিফলন নোহোৱাকে, এনেধৰণৰ এটা পৰিৱেশৰ সৃষ্টি কৰিবলৈ, যিসকলে তেওঁলোকৰ আঙুলিৰ ইচাৰাত কাম কৰিব৷ আৰু যিদিনা বিদেশী শক্তিটো টকা–পইচা বা সুবিধা প্ৰদান বন্ধ কৰি দিব সিদিনা তেওঁলোকৰ কোনো অস্তিত্ব নাথাকিব৷

সেইবাবেই আমি সজাগ থাকিব লাগিব৷ আমাৰ বন্যপ্ৰাণী ৰক্ষাৰ আন্দোলন তথা প্ৰকৃতি ৰক্ষাৰ আন্দোলনক যাতে কোনেও অপব্যৱহাৰ কৰিব নোৱাৰে৷