বৰ্ষাৰণ্য

চৌদিশে ডাঠ ঘন সেউজীয়া

আহল–বহল এখন ডাঙৰ হাবি

গছ, লতা, ঘাঁহ – বন

ইমান ওখ – ওখ গছ

আকাশ চুবলে যেন গৈ আছে গছবোৰ

মূৰ তুলি চালে আকাশ নেদেখি

সৰু – গছ, জোপোহাৰ শাৰীও আছে

ওখ গছৰ ছাঁত নিশ্চিন্তে, নিৰাপদে

এখন দুতৰপীয়া হাবি!

মাথো গছ – বিৰিখেই নে?

আছে ক‘ত‘ কীট – পোক

ৰঙ – বিৰঙী পখিলা, চৰাই – চিৰিকতি

সৰু – ডাঙৰ জীৱ –জন্তুৰ নিৰ্ভয় বিচৰণ

বৰ্ষাৰণ্য নামেৰে সুবিদিত

দিহিং – পাটকাই

ঐশ্বৰ্য্যৰ পাৰ নাই

দশোদিশে বৈ গ‘ল গৰিমা অপাৰ

প্ৰাচ্যৰ ” আমাজন ‘ ৰত্নৰ আঁকৰ!!

সম্ভেদ ওলাল মাটিৰ তলতে কলা ৰতন

লালায়িত হল এচাম

চলিল খনন

বৰ্ষাৰণ্য ভুমিত হল কম্পন

অৰণ্য পৰিয়াল হ‘ল সচেতন

নুশুনা হ‘ল চৰাইৰ কুঞ্জন

দেওদিয়া পখিলাৰ উৰণ – ঘুৰণ,

আতৰিল পৰিচিত হল‘ক – গিবন

সম্বন্ধ বিচাৰি গ‘লে

আমাৰেই কুটুম

সাতাম পুৰুষীয়া বান্ধোন!

এজাক প্ৰকৃতিপ্ৰেমী আহিল ওলাই

জীৱকুলক নিৰ্ভয় দি ডংকা বজাই

ৰক্ষা কৰিলে বৰ্ষাৰণ্যৰ প্ৰাণ

ৰাখিলে দেশৰ মান

উজলাই অসম – সম্পদ

সচাঁকৈয়ে আমাৰ সকলো আছিল

সকলো আছে আৰু থাকিবও

দেখিছো লৰাহঁতৰ সজাগ মন

হ‘বলৈ নিদিয়ে একো

ক্ষতি – ক্ষয়

সদা   বিৰাজিব দিহিং পাটকাই

বিশ্বখ্যাত   প্ৰাচ্যৰ ” আমাজন ” ।।