সেউজ নিজৰা – An Open Desk For Nature Lovers.

প্ৰকৃতি সাহিত্য আৰু প্ৰকৃতি সংৰক্ষণ এই বিষয়টো সাম্প্ৰতিক সময়ৰ এটা অতি গুৰুত্বপূৰ্ণ বিষয় হিচাপে বিবেচিত হোৱা দেখিবলৈ পোৱা গৈছে৷ এই বিষয়টোৰ ওপৰত মোৰ ধাৰণা প্ৰথম অৱস্থাত তেনেই নগণ্য আছিল৷ কিন্তু নৰ্থ লখিমপুৰ বিশ্ববিদ্যালয়ৰ অসমীয়া বিভাগৰ স্নাতক তৃতীয় ষান্মাসিকৰ পাঠ্যক্ৰমত অন্তভুৰ্ক্ত ‘‘অসমীয়া সাহিত্যত প্ৰকৃতি সচেতনতা’’ শীৰ্ষক কাকতখনৰ জৰিয়তে পোনপ্ৰথমবাৰৰ বাবে প্ৰকৃতি সাহিত্য বা প্ৰকৃতি সংৰক্ষণ চেতনা সম্পৰ্কে অৱগত হ’বলৈ সুযোগ লাভ কৰিছিলোঁ৷ কাকতখন অধ্যয়নৰ জৰিয়তে প্ৰকৃতি সাহিত্য বা প্ৰকৃতি সংৰক্ষণৰ প্ৰতি থকা মোৰ পূৰ্বৰ ধাৰণা সলনি হৈছিল৷ কাকতখন অধ্যয়নৰ যোগেদি ১৯৮২ চনত জন্মলাভ কৰা এক প্ৰকৃতি সংস্থা ‘নেচাৰ্চ বেকন’ৰ বিষয়ে জানিবলৈ সক্ষম হৈছিলোঁ৷ এনে এটি পৃথক বিষয় ছাত্ৰ-ছাত্ৰীসকলক জনাৰ সুবিধা প্ৰদান কৰাৰ বাবে নৰ্থ লখিমপুৰ বিশ্ববিদ্যালয়ৰ অসমীয়া বিভাগক অশেষ ধন্যবাদ জ্ঞাপন কৰিছোঁ৷ কাকতখনৰ লগত সংগতি ৰাখি আমাক বিভাগৰ মুৰব্বী অধ্যাপক ড॰ অৰবিন্দ ৰাজখোৱা ছাৰে আমাৰ বিশ্ববিদ্যালয়ৰ চৌপাশত থকা বিভিন্ন গছ-গছনি, চৰাই-চিৰিকতি, কীত-পতঙ্গ আদিৰ লগত চিনাকি কৰাই দিয়াৰ উদ্দেশ্যে বিশ্ববিদ্যালয়ৰ চৌপাশ পৰিদৰ্শন কৰোৱাই৷

            উক্ত কাকতখন পঢ়াৰ পিছতে নৰ্থ লখিমপুৰ বিশ্ববিদ্যালয়ৰ সপ্তম নৰ্থ লখিমপুৰ বিশ্ববিদ্যালয় গ্ৰন্থমেলাৰ লগত সংগতি ৰাখি ১৯ মাৰ্চ, ২০২৫ তাৰিখে অসমীয়া বিভাগ আৰু নেচাৰ্চ বেকনৰ সহযোগত প্ৰকৃতি সাহিত্য শীৰ্ষক এখন আলোচনা চক্ৰ অনুষ্ঠিত কৰা হৈছিল৷ উক্ত অনুষ্ঠানটিতে প্ৰকৃতি সংৰক্ষণৰ প্ৰয়োজনীয়তাৰ লগতে আমাৰ স্থানীয় চৰাইৰ বাহ, কণী আৰু বাসস্থান কেনেদৰে সংৰক্ষণ কৰিব পাৰি সেই সম্পৰ্কে আমাক অৱগত কৰাই অনুষ্ঠানটিত সমল ব্যক্তি হিচাপে উপস্থিত থকা নেচাৰ্চ বেকনৰ সঞ্চালক সৌম্যদ্বীপ দত্ত আৰু সেই সংস্থাৰ সদস্য যুগল সন্দিকৈ ছাৰে৷ উক্ত অনুষ্ঠানটিতে নতুন শিক্ষানীতি ২০২০ অনুসৰি আমাৰ স্নাতক পঞ্চম ষান্মাসিকত ইণ্টাৰ্ণশ্বিপৰ যি এখন কাকত অন্তৰ্ভুক্ত আছিল সেই ইণ্টাৰ্ণশ্বিপৰ বিভিন্ন পদ্ধতি সম্পৰ্কেও আমাক তেওঁলোকে অৱগত কৰাই৷

            তাৰ পৰৱৰ্তী সময়ত ২৫ জুন, ২০২৫ তাৰিখে আমাৰ বিভাগৰ শিক্ষাগুৰু আৰু গৱেষকসকলৰ সহযোগত ইণ্টাৰ্ণশ্বিপ সম্পৰ্কে প্ৰথমখন সভা অনুষ্ঠিত কৰা হয়৷ এই সভাত নেচৰ্চা বেকনৰ সঞ্চালক সৌম্যদ্বীপ দত্ত আৰু যুগল সন্দিকৈ উপস্থিত আছিল৷ এই অনুষ্ঠানতে আমাক ইণ্টাৰ্ণশ্বিপৰ বিষয় নিৰ্বাচন কৰি দিয়াৰ লগতে আমি এই ক’ৰ্চটিত কেনেদৰে আগবাঢ়িব লাগিব সেই সম্পৰ্কে আমাক অৱগত কৰাই৷ ২৫ জুন তাৰিখৰপৰাই আমাৰ ইণ্টাৰ্ণশ্বিপ কাৰ্যসূচী আৰম্ভ হৈছিল বুলি ক’ব পাৰোঁ৷ আমাৰ গ্ৰীষ্ম বন্ধ আৰম্ভ হোৱাৰ লগে লগে অৰ্থাৎ ৰ জুলাইৰপৰা পোনপ্ৰথমে আমাৰ চৌপাশত থকা বিভিন্ন ধৰণৰ চৰাই পৰ্যবেক্ষণ কৰিবলৈ চেষ্টা কৰিছিলোঁ, যিহেতু আমাৰ বিষয়টো আছিল — ‘‘চৰাই পৰ্যবেক্ষণ আৰু সংৰক্ষণ’’৷ প্ৰথম অৱস্থাত আমি সততে দেখিবলৈ পোৱা বিভিন্ন ধৰণৰ চৰাইৰ গতি-বিধি লক্ষ্য কৰিছিলোঁ, আমাৰ অঞ্চল বা জিলাত থকা বিভিন্নজন প্ৰকৃতিকৰ্মীৰ লগত কথা পাতিছিলোঁ আৰু জানিবলৈ পাই সুখী হৈছিলোঁ যে তেওঁলোকে নিজৰ ঘৰতে চৰাইৰ বাসস্থান সাজিবলৈ সুবিধা কৰি দিছে৷