দিহিং- পাটকাই ৰাষ্ট্ৰীয় উদ্যান

বিভিন্ন প্ৰজাতিৰ পখিলা আৰু হাজাৰ হাজাৰ কীত–পতংগৰ বাসস্থান দিহিং পাটকাই ৰাষ্ট্ৰীয় উদ্যান। সৰীসৃপ আৰু উভচৰ গোষ্ঠীৰ কিছুমান আপুৰুগীয়া প্ৰজাতি পোৱা যায় এই অঞ্চলত। বিভিন্ন প্ৰজাতিৰ সাপ আদিকে ধৰি ৪২ প্ৰজাতিৰ উভচৰ আৰু সৰীসৃপ, ২০৫ প্ৰজাতিৰ পোক পতংগ, ৫২ প্ৰজাতিৰ বনৰীয়া মাছ,১০৭ প্ৰজাতিৰ অৰণ্য কেৰু (Orchids) ১৬০ প্ৰজাতিৰ বেছি গছ গছনি এই ৰাষ্ট্ৰীয় উদ্যানত নথি ভুক্ত কৰা হৈছে। এই আপুৰুগীয়া বৰ্ষাৰণ্য আৰু তাৰ জৈৱবৈচিত্ৰ আমাৰ সম্পদ, ইয়াক সংৰক্ষণ কৰাৰ দায়িত্ব আমাৰ প্ৰত্যেকৰে। এই ৰাষ্ট্ৰীয় উদ্যানক সামৰি এটা বৃহৎ অঞ্চল এক অতি গুৰুত্বপূৰ্ণ হস্তীবসতি অঞ্চল। এই অঞ্চলৰ হাতীবোৰ অসম–অৰুণাচলৰ কেইবাখনো অৰণ্য বিচৰণ কৰি ফুৰে। ভাৰত চৰকাৰৰ হস্তী প্ৰকল্পত এই অঞ্চলক সামৰি লোৱা হৈছে। অৰণ্য সংৰক্ষণৰ সফলতাৰ ওপৰত হাতী প্ৰকল্পৰ সফলতা পৰস্পৰ নিৰ্ভৰশিল। হস্তী প্ৰকল্পৰ লগত অৰণ্য বা হাতীৰ বাসস্থান সংৰক্ষণৰ কোনো আইনগত সম্পৰ্ক নাই। গতিকে হাতীৰ বাসস্থান সংৰক্ষণ কৰিবলৈ হলে অভয়াৰণ্য আৰু ৰাষ্ট্ৰীয় উদ্যান গঠন প্ৰক্ৰিয়া অতি দৰকাৰী। বাসস্থান সুৰক্ষিত নহলে হস্তী প্ৰকল্পৰ কোনো মূল্য নাই। তৃণভোজী বন্যপ্ৰাণী– শৰ পহু, সুগৰী পহু, কেটেলা পহু, ইয়াত পোৱা। ইয়াৰ উপৰিও জহামাল, নেঁওল, লতামাকৰি, হেপা, কেৰ্কেটুৱা ইত্যাদি পোৱা যায়। বন্যপ্ৰাণীৰ প্ৰাচুৰ্য, বৈশিষ্টপূৰ্ণ পৰিস্থিতিতন্ত্ৰ আৰু ভৌগোলিক অবদানে এই বনাঞ্চলক অনন্য মাত্ৰা প্ৰদান কৰিছে। অসমৰ পৰ্যটন শিল্পৰ বিকাশত এই অঞ্চলৰ সম্ভাৱনীয়তা বহুত বেছি। দেশী–বিদেশী দুয়ো ধৰণৰ পৰ্যটকে অসমৰ বৰ্ষাৰণ্যই আকৰ্ষিত কৰিছে। এই অঞ্চলত পৰ্যটন শিল্প গঢ়ি উঠাৰ সুবিধা খিনি সংশ্লিষ্ট কতৃপক্ষই আগবঢ়াব লাগিব। সেয়ে স্থানীয় ৰাইজৰ সহযোগত “প্ৰকৃতি–পৰ্যটন” (Eco-Tourism) ব্যৱস্থাপনা হব লাগিব। তেতিয়া অৰণ্যৰ দাঁতিকাষৰীয়া গাওঁবাসীৰ আৰ্থ–সামাজিক উন্নয়ন হব। অৰণ্যৰ দাঁতিকাষৰীয়া গাওঁবাসীৰ আৰ্থ–সামাজিক উন্নতিৰ লগত অৰণ্য সংৰক্ষণৰ কথাটো নিৰ্ভৰশীল। এই অৰণ্যৰ চাৰিওফালে পকী পথেৰে বিভিন্ন চহৰৰ লগত সংযোগ আছে। ডিব্ৰুগড়, তিনিচুকীয়া, দুলীয়াজান, নাহৰকটীয়া, নামৰূপ, জয়পুৰ, ডিগবৈ, ভাদৈ–পাঁচআলি, মাৰ্ঘেৰিটা, মৰাণ ইত্যাদি। আনহাতে অৰুণাচল প্ৰদেশৰ দেওমালি,খুনচা ইত্যাদি ঠাইলৈ এই বৰ্ষাৰণ্যৰ সোঁমাজেৰে যাতায়তৰ ব্যৱস্থা আছে। ৰেলপথেৰেও ভাৰতৰ বিভিন্ন ঠাইৰ লগত যাতায়তৰ ব্যৱস্থা আছে। ডিব্ৰুগড় চহৰৰ ওচৰত মোহনবাৰী বিমান বন্দৰৰ পৰা দিহিং পাটকাই ৰাষ্ট্ৰীয় উদ্যানলৈ যাতায়ত ব্যৱস্থা আছে। মোহনবাৰী বিমান বন্দৰৰ পৰা গুৱাহাটী,কলিকতা দিল্লী আদি ঠাইলৈ পোনপটীয়া বিমান সেৱা আছে। পৰ্যটকসকলে এই অৰণ্যত চৰাই পৰ্যবেক্ষণ, জঙ্গল ট্ৰেকিং, হলৌ বান্দৰ পৰ্যবেক্ষণ, নেচাৰ কেম্প, নেচাৰ ফটোগ্ৰফি ইত্যাদি বিভিন্ন অৰণ্য ভিত্তিক কাৰ্যকলাপ সম্পন্ন কৰিব পাৰে। দিহিং–পাটকাই ৰাষ্ট্ৰীয় উদ্যানৰ কাষৰীয়া জনজাতীয় গাঁওসমূহ পৰ্যটক সকলে পৰিভ্ৰমণ কৰিব পাৰে আৰু জনজাতীয় পৰম্পৰা, কৃষ্টি–সংস্কৃতি, জীৱন শৈলী আদি চাব পাৰে, যাৰ ফলত সংস্কৃতিক বিনিময়, মানৱীয় উৎকৰ্ষ, সামাজিক উৎকৰ্ষ সাধন হব পাৰে। জনজাতীয় লোকসকল ঘৰতে তৈয়াৰ কৰা কিছু কিছু সামগ্ৰী বিক্ৰীৰ জৰিয়তে আৰ্থিক উন্নতি সম্ভৱ হব পাৰে। গাওঁৰ মানুহবোৰ অতিথিপৰায়ণ আৰু দিহিং–পাটকাই লৈ তেওঁলোক গৌৰৱান্বিত।