নেচাৰ্চ বেকনৰ পবিতৰা বনৰীয়া চৰাই সংৰক্ষণ উৎসৱ

নেচাৰ্চ বেকনৰ হৈ ড॰ মৰমী তালুকদাৰে আঁতধৰা অনুষ্ঠানটি বন্তি প্ৰজ্বলনেৰে শুভাৰম্ভ কৰে পবিতৰা বনৰীয়া চৰাই সংৰক্ষণ উৎসৱৰ অভ্যৰ্থনা সমিতিৰ সভাপতি ৰাম চন্দ্ৰ নাথে৷ বন্তি প্ৰজ্বলন কাৰ্যসূচীৰ পিছতে মায়বং ইক’ ৰিজৰ্টৰ কৰ্মচাৰীসকলে পৰিৱেশন কৰা আকৰ্ষণীয় বাদ্য সংগীতে উপস্থিত সকলোকে আপ্লুত কৰে৷ অনুষ্ঠানত সাহিত্য একাডেমীৰ শ্ৰেষ্ঠ অনুবাদকৰ বঁটাপ্ৰাপক বিপুল দেউৰী, ভূমি সংৰক্ষণ বিভাগৰ অৱসৰপ্ৰাপ্ত সঞ্চালক তথা বিশিষ্ট লেখক ইন্দ্ৰজিৎ দত্ত, বিশিষ্ট লেখক–শিক্ষাবিদ ড॰ জগদীন্দ্ৰ ৰায়চৌধুৰী, সুপৰিচিত ফটোগ্ৰাফাৰ সঞ্জীৱ গোহাঁই বৰুৱা আৰু গুৱাহাটীৰ প্ৰাগজ্যোতিষ মহাবিদ্যালয়ৰ অধ্যক্ষ ড॰ মনোজ কুমাৰ মহন্তই আমন্ত্ৰিত অতিথি হিচাপে উপস্থিত থকাৰ লগতে মায়ং মহাবিদ্যালয়ৰ অৱসৰপ্ৰাপ্ত অধ্যক্ষ ড॰ ফণী ভূষণ নাথ, মায়ং উচ্ছতৰ মাধ্যমিক বিদ্যালয়ৰ অৱসৰপ্ৰাপ্ত অধ্যক্ষ প্ৰফুল্ল দাস, মায়ং গাঁও পঞ্চায়তৰ সভাপতি ৰাজেন নাথ প্ৰমুখ্যে বিশিষ্ট ব্যক্তিসকলৰ উপস্থিতিয়ে অনুষ্ঠানটিৰ সৌষ্ঠৱ বৃদ্ধি কৰে৷ উপস্থিত অভ্যাগতসকলক আয়োজক নেচাৰ্চ বেকনৰ তৰফৰ পৰা একোখনকৈ ফুলাম গামোচা আৰু পাকৈঢোঁৰা [Oriental Pied Hornbill] সংৰক্ষণৰ বাৰ্তা সমৃদ্ধ একোখনকৈ ফ্ৰেমযুক্ত প’ষ্টাৰেৰে সম্বৰ্ধনা জনোৱা হয়৷ ইয়াৰ পিছতে নিজৰ আদৰণি ভাষণত নেচাৰ্চ বেকনৰ সঞ্চালক সৌম্যদ্বীপ দত্তই নেচাৰ্চ বেকনৰ চাৰি দশকজোৰা অবিৰত যাত্ৰাৰ কথা অৱগত কৰি নেচাৰ্চ বেকন কেৱল এক ব্যক্তি বিশেষৰ সংগঠন নহয়, ই এক সংঘবদ্ধ নাম বুলি কৈ নেচাৰ্চ বেকনৰ আদৰ্শ তথা প্ৰকৃতি সংৰক্ষণকামী চিন্তা–চেতনাৰে উদ্বুদ্ধ প্ৰতিগৰাকী প্ৰকৃতিপ্ৰেমী জনসাধাৰণেই ইয়াৰ অংশীদাৰ বুলি তেওঁ উল্লেখ কৰে৷ তেওঁ নেচাৰ্চ বেকনৰ উদ্যোগত ১৯৯২ চনৰ পৰাই সমগ্ৰ অসমতে ‘অসমৰ বনৰীয়া চৰাই আৰু ইয়াৰ বাসস্থান সংৰক্ষণ অভিযান’ শীৰ্ষক এলানি কাৰ্যসূচী চলি থকা বুলি উল্লেখ কৰি বৰ্তমানে অসমৰ বনৰীয়া চৰাই সংৰক্ষণৰ ক্ষেত্ৰত ই এক গণ আন্দোলনৰ ৰূপ লৈছে বুলিও কয়৷ নেচাৰ্চ বেকনৰ প্ৰতিগৰাকী কৰ্মীয়েই এইক্ষেত্ৰত নিঃস্বাৰ্থভাৱে কাম কৰি আছে বুলিও তেওঁ উল্লেখ কৰে৷ তেওঁ এই উৎসৱ আয়োজনৰ মূল উদ্দেশ্যও বনৰীয়া চৰাই তথা প্ৰকৃতি সংৰক্ষণ বুলি উল্লেখ কৰে৷ শ্ৰী দত্তই জন্মলগ্নৰে পৰাই নেচাৰ্চ বেকনে প্ৰকৃতি তথা পৰিৱেশ সংৰক্ষণৰ হকে নিত্য নতুন চিন্তাৰে ব্যতিক্ৰমী কাম কৰি আহিছে বুলি উল্লেখ কৰি পবিতৰাৰ এই উৎসৱো ঠিক তেনে কিছু আদৰ্শৰে প্ৰভাৱান্বিত বুলি কয়৷ শ্ৰী দত্তই আৰু কয় যে — এই উৎসৱৰ মূল উদ্দেশ্য সংৰক্ষণ৷ আমি সকলোৱে বনৰীয়া চৰাই আৰু প্ৰকৃতিত ইয়াৰ ভূমিকা আৰু অৱদানৰ বিষয়ে অৱগত৷ সেয়েহে নতুন প্ৰজন্মলৈ এই সংৰক্ষণ বাৰ্তা বহন কৰাটো অতীৱ প্ৰয়োজনীয়৷ আমাৰ চৌপাশৰ বিনন্দীয়া চৰাইসমূহৰ সুৰক্ষা আৰু সংৰক্ষণ তেতিয়াহে সফল হ’ব যেতিয়া ইয়াৰ সংৰক্ষণৰ বাৰ্তা জনগণৰ মাজলৈ যাব৷ সেয়ে পবিতৰা, মায়ং অঞ্চলৰ বিদ্যালয়সমূহৰ ছাত্ৰ–ছাত্ৰী, শিক্ষক–শিক্ষয়িত্ৰী, কৃষক সমাজক লৈ অনুষ্ঠিত কৰা এই সংৰক্ষণ উৎসৱে পবিতৰাৰ সংৰক্ষিত ভৱিষ্যতক আৰু এখোজ সুদৃঢ় কৰিব৷ পবিতৰালৈ সঘনাই গৈ থকা প্ৰতিগৰাকী ব্যক্তিয়ে অনুভৱ কৰিব যে মায়ঙৰ মায়াময় পৰিৱেশ যেন ক্ৰমাৎ কংক্ৰিটৰ আৱৰণত আবদ্ধ হৈ গৈ আছে৷ পবিতৰা অভয়াৰণ্যৰ চৌপাশৰ এই পৰিৱৰ্তিত পৰিৱেশৰ প্ৰতি তাৰ স্থানীয় জনসাধৰণক সজাগ কৰাটো নিত্যান্তই প্ৰয়োজনীয় হৈ উঠিছে৷ মায়বং ইক’ ৰিজৰ্টৰ শ্ৰী নৃপেন নাথ আৰু তেওঁৰ সহযোগীসকলে অতি সুন্দৰকৈ পবিতৰা অঞ্চলত সংৰক্ষণৰ কাম কৰি আহিছে৷ মায়বং ইক’ ৰিজৰ্টৰ আৰণ্যিক পৰিৱেশলৈ চালে এই কথা অধিক স্পষ্ট হয়৷ প্ৰকৃতিৰ সুৰক্ষাৰ হকে ৩৫–৪০ বছৰ কাম কৰি অহা এই মানুহগৰাকীৰ জীৱনবোধো খুব সুন্দৰ৷ তেওঁৰ লগতে তেওঁৰ ৰিজৰ্টৰ সহযোগীসকলো প্ৰকৃতিক লৈ সদায় সচেতন আৰু সজাগ৷ ৰাতিপুৱা মায়বং ইক’ ৰিজৰ্ট Oriented Pied Hornbillৰ কাকলিৰে মুখৰিত হৈ উঠে৷ এই হৰ্ণবিল জাকৰ অনুপম দৃশ্য চাবলৈ ৰিজৰ্টখনলৈ বহু পৰ্যটকৰ আগমন হয়৷ নৃপেন নাথ নেচাৰ্চ বেকনৰ এগৰাকী নিষ্ঠাৱান কৰ্মী আৰু এই হৰ্ণবিল জাকৰ লগতে অইন বন্যপ্ৰাণ সংৰক্ষণৰ হকে তেওঁ মায়ংবাসী ৰাইজৰ সৈতে বহুতো কাম কৰিছে৷ সচেতন পৰ্যটকৰ মায়বং ইক’ ৰিজৰ্ট ভ্ৰমণে তেওঁৰ সংৰক্ষণৰ কাম–কাজক যথেষ্ট অগ্ৰগতি প্ৰদান কৰিব বুলি আমি আশাবাদী৷ নেচাৰ্চ বেকনৰ এই বনৰীয়া চৰাই সংৰক্ষণ উৎসৱত মায়ঙৰ স্থানীয় ৰাইজৰ লগতে ধেমাজি, ডিব্ৰুগড়, নলবাৰী, মঙলদৈ, ছিপাঝাৰ, ওদালগুৰি, গোৱালপাৰা, কামৰূপ আদিকে ধৰি সমগ্ৰ অসমৰ বিভিন্ন ঠাইৰ পৰা প্ৰকৃতি সংৰক্ষণৰ প্ৰতি সচেতন ব্যক্তিয়ে অংশগ্ৰহণ কৰাটো এক উল্লেখনীয় দিশ বুলিও তেওঁ উল্লেখ কৰে৷ তেওঁ বৃহত্তৰ মায়ং অঞ্চলৰ ছাত্ৰ–ছাত্ৰীসকলক লৈ সংৰক্ষণকামী কাম–কাজ অবিৰতভাৱে কৰি যাব বুলি কৈ ‘পবিতৰা বনৰীয়া চৰাই সংৰক্ষণ উৎসৱ’ৰ দৰে অনুষ্ঠান নেচাৰ্চ বেকনে ভৱিষ্যতেও অনুষ্ঠিত কৰিব বুলি আশ্বাস প্ৰদান কৰে৷ নিজৰ আদৰণি ভাষণৰ পিছতে শ্ৰী দত্তই অসমৰ শিক্ষা, জনজাতি পৰিক্ৰমা [ভৈয়াম], খিলঞ্জীয়া আৰু জনজাতীয় বিশ্বাস আৰু সংস্কৃতি [সংগ্ৰহালয় আৰু পুথিভঁৰাল সঞ্চালকালয়] দ৫১১ মন্ত্ৰী ডাঃ ৰণোজ পেগুদেৱে ‘পবিতৰা বনৰীয়া চৰাই সংৰক্ষণ উৎসৱ’ উদ্দেশ্যে প্ৰেৰণ কৰা এটি শুভেচ্ছাবাণীও উপস্থিতসকলৰ জ্ঞাতাৰ্থে পাঠ কৰি দিয়ে৷